د ګردیز- زرمت سړک د جوړولو چارې رسما نن پيل شوې
د پکتیا ولایت مرکز ګردیز او زرمت ولسوالي ترمنځ غځیدلي سړک د جوړولو چارې نن د اوبو او انرژي وزارت سرپرست وزیر محترم الحاج ملا عبداللطیف منصور، د کورنیو چارو وزارت معین محترم مولوي محمد نبي عمري، د ټولګټو چارو وزارت معین محترم مولوي عبدالکریم فاتح د پکتیا والي محترم حاجي دعوت صاحب، د یاد ولایت مرستیال والي محترم مولوي انعام الله صلاح الدین د پکتیا ولایت د ټولګټو چارو رئيس او نورو ولایتي رئيسانو او د زرمت د قومي مشرانو په شتون کې پیل شوې.
د یادو مراسمو په بهیر کې امارتي مسؤلینو د خپلو ویناو په ترڅ کې ژمنه وکړه چې د خپلو مسؤلیتونو، امکاناتو او متوازن انکشاف په چوکاټ کې به د سیمې لپاره د نورو ټولګټو پروژو د پلي کولو لپاره هم هڅې وکړي، ترڅو خپلو مجاهدو هېوادوالو ته د هوسا او بسیا ژوند شرایط برابر کړي.
په ورته مهال، د سیمې اوسیدونکو او قومي مشرانو د یادې پروژې د چارو له پیلولو څخه خوښي وښوده او زیاته یې کړه، چې د دغې پروژې په سر ته رسېدلو سره به د سیمې د خلکو په ټولنیز او اقتصادي ژوند کې د پام وړ مثبت بدلون رامنځته شي.
دغه غونډه د ګران هېواد او هېوادوالو د آبادي، سوکالي او سمسورتیا په دعا سره پای ته ورسېده.
یاده دې وي چې یاد سړک د هېواد له مهمو سړکونو څخه دی چې د زرمت پر ولسوالي برسېره د روحاني بابا ولسوالي او غزني او پکتیکا ولایتونه د پکتیا ولایت له مرکر(ګردیز) سره نښلوي.
