د یوه افغان شرکت رئيس د لمریزې برېښنا د تولید په پروژو کې پانګونې ته لېوالتیا څرګنده کړه
د اوبو او انرژي وزارت د انرژي معینیت د غونډو سرپرست او د پایدارې انرژي عمومي رئيس محترم مولوي عزیزالله سهار د خپل کار په دفتر کې د دغه معینیت د یو شمېر رئيسانو په شتون کې د زولرستان شرکت له رئيس محترم انجنیر عبدالقدیر بارکزي سره وکتل او په هېواد کې د لمریزې برېښنا د تولید په پروژو کې د پانګونې په هکله بحث او د اندونو تبادله وکړه .
په دغه لیدنه کې، ښاغلي بارکزي په هېواد کې د لمریزې برېښنا د تولید په پروژو کې پانګونې ته لېوالتیا څرګنده او په دې برخه کې د همکاري غوښتنه وکړه.
په ورته مهال، د انرژي معینیت د غونډو سرپرست او د پایدارې انرژي عمومي رئيس په دغه لیدنه کې د نوموړي شرکت رئيس ته په هېواد کې د لمریزې برېښنا د تولید په پروژو کې د پانګونې په موخه د هر راز همکاري ډاډ ورکړ او زیاته یې کړه، چې مونږ د هېواد د هر ولایت لپاره د برېښنا انرژي په پروژو کې د پانګونې په موخه چمتو شوی پلان لرو او هر ډول همکاري ته چمتو یو.
همدغه راز، د دغې ناستې په پای کې د دواړو لورو د تخنیکي ټیمونو ترمنځ د ګډو ناستو په ترسره کولو باندې ټینګار وشو.
دا په داسې حال کې ده، چې په دې وروستیو کې د انرژي په پروژو کې پانګونې ته د ګڼ شمېر کورنيو او بهرنيو شرکتونو لېوالتیا ډېره شوې ده.
