د یوه ایراني او افغان شرکت مسؤلینو له غزني څخه تر کندهاره پورې د پنځو سب سټیشنونو په جوړلو باندې پانګونې ته لېوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور د دغه وزارت د دفتر د عمومي رئيس محترم قاري محمد عبدالعزیز عزیز او د وزارت د یو شمېر نورو رئيسانو په شتون کې د اطلس مهدي یار آسمان هشتم ایراني شرکت له رئيس محترم محمد خوازي او د نذیراحمد لوژستیکي او تدارکاتي شرکت له رئیس محترم حاجي نذیر احمد او مل پلاوي سره وکتل.
په دغه لیدنه کې، د نوموړو شرکتونو رئيسانو له غزني څخه تر کندهاره پورې د پنځو سب سټیشنونو په جوړولو باندې پانګونې ته لېوالتیا څرګنده او په دې برخه کې خپل بشپړ چمتووالی څرګند کړ.
په ورته مهال، په دغه لیدنه کې د اوبو او انرژي سرپرست وزیر په نوموړې پروژه کې د نوموړو شرکتونو د پانګونې د لېوالتیا د هر کلي ترڅنګ زیاته کړه، چې اوسمهال په افغانستان کې د پانګونې لپاره له هره پلوه زمینه چمتو شوې او مونږ په دې برخه کې هر راز همکاري ته چمتو یو. هغه د دغې پروژې د چارو د پيل په موخه د پروپوزلونو او قرار داد پر لاسلیک کېدو باندې ټینګار وکړ.
همدارنګه، د دغې ناستې په پای کې د وزارت او د نوموړو شرکتونو د تخنیکي مسؤلینو ترمنځ د عملي چارو د پيل لپاره دګډو ناستو په ترسره کېدو باندې ټینګار وشو.
