مشرانو جرګې د یو پر ځان بسیا افغانستان لپاره د اوبو د چارو د تنظیم ملي ادارې کړنې وستايلې.
د افغانستان ملي شورا د مشرانو جرګې د شکایتونو کمېسیون د اوبو د چارو د تنظیم ملي ادارې لوی رئيس انجنیر خان محمد تکل د دغې ادارې یو شمېر مسایلو په اړه د وضاحت ورکولو په موخه خپل حضور ته بللی وو، ښاغلي تکل د یاد کمېسیون رئيس او غړو ته د اوبو د چارو د تنظیم ملي ادارې د کړنو او فعالیتونو په اړه هر اړخیز معلومات وړاندې کړل؛ چې په پایله کې د یاد کمېسیون رئيس ښاغلي زلمي زابلي د اوبو د چارو د تنظیم ملي ادارې د کړنو او فعالیتونو قدرداني وکړه.
د مشرانو جرګې د شکایتونو کمېسیون رئيس ښاغلي زلمي زابلي د اوبو د چارو د تنظیم ملي ادارې لوی رئيس ښاغلي تکل ته په اشارې وویل، دا چې ستاسو کړنې افغانستان شموله او پر ځان بسیا هېواد لپاره دي؛ مشرانو جرګه مو د غوره فعالیتونو قدرداني کوي او د الله تعالی له در بار څخه درته د لا ډير خدمت هیله کوي.
ښاغلي تکل په خپلو خبرو کې د مشرانو جرګې له مشرتابه او د شکایتونو کمېسیون له رئيس او غړو څخه مننه وکړه او زیاته یې کړه چې د اوبو د چارو د تنظیم ملي اداره په هېواد کې د اوبو مهار او متوازنې پراختیا ته ژمنه ده، هغه وویل دغه اداره به هېڅکله د ولس باور زیانمن نه کړي؛ خپلې چارې به په ښه کیفیت، پر وخت او د هېواد سرلوړۍ لپاره تر سره کوي.
د یادونې وړ ده چې وخت نا وخت د مشرانو جرګې په ګډون یو شمېر نورو مهمو دولتي او غیر دولتي ارګانونو لخوا د اوبو د چارو د تنظیم ملي ادارې او د دغې ادارې د مسؤلینو فعالیتونه ستايلي.
د اوبو د چارو د تنظیم ملي اداره د هېواد په ۳۴ ولایتونو او ټولو ولسوالیو کې د اوبو مدیریت په برخه کې لوې بندونه، کانالونه، کاریزونه، چکډم، جذبي څاګانې، ګبیوني او استنادي دېوالونه او نورې پروژې تر لاسه لاندې لري.
