میدان وردګ ولایت کې د ځمکې لاندې اوبو د بېځایه لګښت او خپل سرو څاګانو کېندلو د مخنیوي او د څاڅکي اوبو سیسټم فعالولو په هکله معلومات وړاندې شول
د میدان ښار سیندیزې فرعي حوزې رئيس محترم مولوي عبدالصمد حلیم او ورسره مل تخنیکي ټیم چک ولسوالي ته سفر وکړ او د نوموړې ولسوالي له ولسوال محترم عبدالغني آخندزاده او د خلکو له استازو سره وکتل.
په دغه لیدنه کې، ښاغلي حلیم د ځمکې لاندې اوبو د بېځایه لګښت او خپل سرو څاګانو کېندلو د مخنیوي، د څاڅکي اوبو سیسټم د فعالولو او د اوبو او انرژي په برخه کې د دغه ریاست د منظور شوو پروژو په هکله اړین معلومات وړاندې کړل او غوښتنه یې وکړه، چې د خپل سرو څاګانو کېندلو د مخنیوي په برخه کې همکاري وکړي.
په ورته مهال، د چک ولسوال او د خلکو استازو په دغه لیدنه کې ژمنه وکړه، چې د خپل سرو څاګانو د کېندلو په برخه کې به همکاري وکړي او د چکډمونو، سربندونو او اوبو بندونو د جوړولو په برخه کې خپلې غوښتنې له ښاغلي حلیم سره شریکې کړې.
