ننګرهار ولایت کې د برېښنا په برخه کې د پانګونې د جذب په موخه کمېټه جوړیږي
ننګرهار ولایت کې د برېښنا په برخه کې د پانګونې د جذب لپاره د کمېټې د جوړولو په موخه یوه ناسته د ننګرهار مرستیال والي محترم مولوي سعیداحمد بنوري په مشري د ننګرهار سیندیزې حوزې رئيس محترم سید فضل احد پاچا، د اوبو او انرژي وزارت د استازو او یو شمېر نورو سیمه ییزو مسؤلینو په ګډون ترسره شوه او د نوموړې کمېټې د رامنځته کولو په هکله بحث او د اندونو تبادله وشوه.
نوموړې کمېټه د ننګرهار سیندیزې حوزې په چوکاټ کې د اړوندو اداره په غړیتوب سره رامنځته کېږي او د برېښنا په برخه کې د پانګونې د جذب، د برېښنا ستونزو د هوارولو، د برېښنا د تولید او د خلکو وړاندیزونو ته د رسیدګي په برخه کې فعالیت وکړي.
همدارنګه په دغه ناسته کې د اوبو او انرژي وزارت د پلازمینې د انرژي چارو آمر سید علي همت په مشري تخنیکي مسؤلینو د دغې کمېټې د مسؤلیتونو او دندو په هکله پرزنټیشن وړاندې کړ او زیاته یې کړه، چې د دې کمېټې څارنه به د ولایت مقام د رهبري په غاړه وي.
همدغه راز، د ناستې په دوام کې د دغه ولایت د نورو سیمه ییزو ادارو مسؤلینو هم د دغې کمېټې د رامنځته کولو او د برېښنا په برخه کې د پانګونې د جذب په موخه خپل اندونه وړاندې کړل.
