هلمند ولایت کې د اوبو په برخه کې یوه پروژه د څه باندې ۴۰۰ زره آمریکایي ډالرو په لګښت بشپړه شوه
د هلمند ولایت د مرکز، لښکرګاه اړوند د هلمند سیند پر غاړه د بست کلا سیمه کې یوه پروژه د ۴۱۶ زره آمریکایي ډالرو په لګښت چې پکې د خاري او بست کلا اوبو لګولو کانالونو د ټینګښت ۶۷۰ متره استنادي دېوال، دوه ټولنیزې سیمې او دوه پلګوټي شامل دي، بشپړه او د هلمند د اوبو او انرژي رئيس محترم ملا محمد یعقوب قایم، د ولایت مقام د استازي محترم رحمت الله روحاني، د خوړو او کرنې سازمان د استازي او یو شمېر نورو سیمه ایزو مسؤلینو په شتون کې ګټې اخیستنې ته وسپارل شوه.
د نوموړې پروژې ګټې ته د سپارلو په مراسمو کې ګډونوالو د هغې د ارزښت په هکله خبرې وکړې او ویې ویل، چې د دې پروژې ګټې ته په سپارلو سره به د نوموړو دوو کانالونو د ویجاړېدو او د سیلابي اوبو د احتمالي خطر د مخې نیولو ترڅنګ، د زرګونو جریبه ځمکو د خړوبوونکو اوبو ساتنه هم په ښه او معیاري توګه ترسره شي .
دغه پروژه د خوړو او کرنې سازمان په مالي لګښت د هلمند د اوبو او انرژي ریاست تر څارنې لاندې پلې او ګټې اخیستنې ته وسپارل شوه.
