په اسلام کې د امیر د اطاعت په اړه د دعوت او ارشاد روزنیز او اصلاحي سیمینار جوړ شو
د اوبو او انرژي وزارت د دعوت او ارشاد ریاست روزنیز او اصلاحي سیمینار د دې ادارې د رئیس محترم مولوي ګل رحمن عارف او د اوبو او انرژي وزارت د یو شمیر کارکوونکو په شتون کې جوړ شو.
دغه ښوونیز سیمینار د قرآن عظیم الشان د مبارکو آیاتونو په تلاوت سره پیل شو، ورپسې د اوبو او انرژي وزارت د دعوت او ارشاد رئیس محترم مولوي ګل رحمن عارف په اسلام کې د امیر د اطاعت په اړه کارکوونکو ته مهم او ګټور معلومات وړاندې کړل.
ښاغلي عارف په خپلو خبرو کې وویل چې د امیر اطاعت په اسلام کې فرض دی او ټول مامورین یې وهڅول چې د خپلو آمرینو اطاعت وکړي.
د دعوت او ارشاد رئيس د خپلو خبرو په دوام کې مامورينو ته د اسلامي احکامو په رعايت، عدالت، تقوا ، اخلاص او له بیت المال څخه په سمه استفاده ټينګار وکړ.
د یادونې وړ ده، چې ښاغلي مولوي عارف د دغو غونډو له جوړېدو څخه موخه د ارزښتناکو اسلامي درسونو زده کړه وبلله او د اسلام د سپېڅلي دين د درسونو زده کړه يې د ټولو مسلمانانو لپاره ضروري او ارزښتناکه وبلله.
