په میدان وردګو ولایت کې د څلورو پروژو چارې د 300 زره ډالرو په ارزښت پیل شوې
د میدان وردګو ولایت په سید آباد ولسوالي کې د څلورو پروژو چارې د 300 زره آمریکایي ډالرو په ارزښت د یاد ولایت د والي محترم مولوي محمد امین جان عمري، د میدان ښار سیندیزې حوزې رئيس محترم مفتي عبدالصمد حلیم، د سید آباد ولسوال او یو شمېر قومي مشرانو په شتون کې پيل شوې.
د یادو پروژو په پرانیست غونډه کې ښاغلي عمري وویل چې د افغانستان اسلامي امارت به هغو ولسوالیو ته ډېره پاملرنه وکړي چې په تېرو کلونو کې له اساسي خدماتو څخه محرومې پاتې شوې وي.
همدغه راز، د میدان ښار سیندیزې حوزې رئيس د دې پروژو په پرانیست غونده کې ولسونو ته ډاډ ورکړ چې د اوبو د مدیریت په برخه کې به د دوی اساسي ستونزو ته جدي پاملرنه وشي او له قراردادي شرکت څخه یې و غوښتل چې د پروژو ودانیزې چارې په لوړ کیفیت جوړې کړي.
د یادو پروژو چارې د FAO موسسې په مالي ملاتړ د میدان ښار سیندیزې حوزې تر څارنې لاندې پرمخ وړل کېږي او چارې یې به د شپږو میاشتو په موده کې بشپړې شي، چې په بشپړيدو سره به یې زرګونه جریبه کرنیزه ځمکه د سیلابونو له ګواښ څخه خوندي شي.
