په پروان ولایت کې د ګلبهار کانال د عمومي سربند پروژې چارې د څه باندې شپږ میلیونه افغانیو په ارزښت پيل شوې
د پروان ولایت په جبل السراج ولسوالي کې د ګلبهار کانال د عمومي سربند د ساتنې او مراقبت پروژې چارې د شپږ میلیونه، یو سلو نه دیرش زره او اته سوه څلور اعشاریه پنځه(6139804.5) افغانیو په ارزښت پيل شوې.
په دې پروژه کې د سلګونو کسانو لپاره د کار زمینه برابره شوې ده او ټاکل شوې چې چارې یې د یوې میاشتې په موده کې بشپړې شي.
د یادې پروژې چارې د غوربند چاریکار سیندیزې فرعي حوزې ترڅارنې لاندې د عالم حسیب ودانیز شرکت له خوا پلې کيږې.
همدارنگه د غوربند- چاریکار سیندیزې فرعي حوزې مسؤلینو د پروان ولایت د شینواري ولسوالي د شیوې درې د آبریزو سروې د چکډومونو د جوړولو او د باران او سطحي اوبو د ذخیره کولو په موخه ترسره کړه.
د یادولو وړ ده چې د دې پروژو په پلي کولو سره به ۱۷۶ هکتاره کرنیزه ځمکه خړوبه شي او په سلګونو کسانو ته به د کار زمینه چمتو شي.
