کنړ ولایت کې د بریکوټ شامادم تحکیماتي پروژه د نږدې پنځه میلیونه افغانیو په لګښت ګټې اخیستنې ته وسپارل شوه
د کنړ ولایت په ناړۍ ولسوالي کې د بریکوټ شامادم تحکیماتي پروژې چارې د ۴میلیونه، ۹۱۱ زره او ۳۱۳ افغانیو په لګښت بشپړې او د کنړ ولایت د اوبو او انرژي رئیس محترم ملا دوست محمد حنفي او یو شمېر نورو سیمه ایزو مسؤلینو په شتون کې ګټې اخیستنې ته وسپارل شوه.
نوموړې پروژه ۱۹۰ متره اوږدوالی لري چې چارې یې د کنړ ولایت د اوبو او انرژي ریاست تر څارنې لاندې د درې میاشتو په موده کې بشپړې او ګټې اخیستنې ته وسپارل شوه.
د یادونې وړ ده، چې د کنړ ولایت په ۱۴ ولسوالیو کې د تحکیماتو او چکډمونو په برخه کې یوه، یوه پروژه د کابو ۴۵ میلیونه افغانیو په ټولیز لګښت د اوبو او انرژي وزارت له بودجې پلي شوې،چې یو شمېر یې ګټې اخیستنې ته سپارل شوې او ځینې نور یې به په نږدې راتلونکي ګټې اخیستنې ته وسپارل شي.
