د اوبو او انرژي وزارت او د کرنې او مالدارۍ وزارت د استازو ترمنځ د همغږي غونډه جوړه شوه.
دغه غونډه د اوبو چارو د تنظیم عمومي رئیس ښاغلی انجنيرعبدالغفور عمري په مشري د اوبو معینیت په تالار کی د رئيسانو، انجنيرانو او اړوندو مسوولينو په شتون کې جوړه شوه.
په دې غونډه کې د هېواد د بندونو د اوبو د کمښت، کرنې، د کبانو د فارمونو سروې او د دغو فارمونو لپاره د اوبو رسول ، د څارویو ساتنه، د روزل شویو او غیر روزل شویو څارویو د ارقامو سروې، د هېواد په هغه سیمو کې چې اوبه یې لږ وي د کانالونو جوړولو ، د کرنې او مالدارۍ وزارت د پروژې د ډیټابیس، د کرنې د اوبو میکانیزم، د قرغې بند د اوبو د کمښت له امله د کرنیزو فارمونو د خړوبولو لپاره د بدیلو لارو موندل، د مشخصو شویو ساحو څخه د تخنیکي او حقوقي ستونزو د حل په هکله بحث او نظر تبادله وشوه،
په دې غونډه کې د زراعتي اوبو په میکانیزه کولو باندې هم بحث وشو، تر څو د کرنې وزارت وکولای شي د اوبو لګولو نوي سیستمونه لکه د اوبو لګولو څاڅکي سیستم په کرنه کې رایج کړای شي.
د اوبو چارو د تنظیم عمومي ریاست کې زیاتره موارد چې په پریزنټیشن کې وړاندې کړل د کرنې او مالدارۍ وزارت د استازو د پام وړ وګرځیده.
