د اوبو او انرژي وزارت سرپرست د تاتارستان د صدراعظم له مرستیال او مل پلاوي سره وکتل
نن سه شنبه ( ۱۴۰۴ لمریز کال د زمري د میاشتې ۱۴مه) د افغانستان اسلامي امارت د اوبو او انرژي وزارت سرپرست محترم الحاج ملا عبداللطیف منصور د خپل کار په دفتر کې د تاتارستان هېواد د صدر اعظم مرستیال او د تجارت او صنعت وزیر ښاغلي کروپ چینکو اولیګ ولادمیروویچ او لوړ پوړي پلاوي سره لیدنه او خبرې اترې وکړې.
پهٔ دغهٔ لیدنه کې دواړو خواوو د دوه اړخیزو اړیکو پر ټینګښت او د همکاریو پر غځولو په ځانګړې توګه په افغانستان کې د اوبو او انرژي پراختیايي پروژو د ترسره کولو په هکله بحث او د اندونو تبادله وکړه.
د تاتارستان د صدراعظم مرستیال، لېوالتیا وښودله چې هېواد یې له افغانستان سره د اوبو او انرژي په پروژو کې همکاري ته تیار دی. له بلې خوا، د اوبو او انرژي سرپرست وزیر هم له دغهٔ وړاندیز څخه هرکلی وکړ او ټینګار یې وکړ چې د دوه اړخیزو همکاریو غځونه به د دواړو هېوادونو لپاره ګټورې وي.
ښاغلي منصور د همکاریو د پیل لپاره، له پنجشېر څخه کابل ته د اوبو د لېږد په پروژه کې ورته د پانګونې وړاندیز وکړ او له هغوی څخه یې د دغې پروژې او د انرژي د نورو طرحو په هکله د اطلاعاتو د تبادلې لپاره د دواړو خواوو د تخصصي ټیمونو ترمنځ د تخنیکي غونډو د جوړولو غوښتنه وکړه. هغه زیاته کړه چې له دغه پړاو وروسته به د دواړو خواوو ترمنځ د همکاري هوکړه لیک لاسلیک شي.
د دغې لیدنې په دوام کې، د تاتارستان د صدراعظم مرستیال د اوبو او انرژي سرپرست ته رسمي بلنه ورکړه تر څو د «د کازان د انرژي نړیوال فورم» چې پکې تجاري برنامې او صنعتي نندارتون شامل دي او د ۲۰۲۶ عیسوي کال د اپرېل په میاشت کې په تاتارستان کې ترسره کېږي، ګډون وکړي.
دغه لیدنه د دوه اړخیزو اړیکو پر غښتلتیا او د همکاریو د غځولو په ټینګار سره پای ته ورسېده.
