د اوبو معینیت اونیزه تخنیکي ناسته د تخنیکي او تقنیني اسنادو د څېړلو او د راتلونکي پراختیایي پروژو د لیست چمتوکولو په هکله ترسره شوه
دغه ناسته د پنج شنبې په ورځ د ۱۴۰۴ هـ ل لمریز کال د تلې میاشتې په ۲۴ نېټه ، د اوبو معین محترم مجیب الرحمن عمر آخندزاده تر ریاست لاندې د دغه معینیت د رئيسانو، سلاکارانو او تخنیکي مسؤلینو په شتون کې ترسره شوه.
د ناستې په پیل کې، د چمتو شوې تخنیکي او تقنیني اسنادو د لنډ راپور په هکله بحث و شو. اړوندو مسؤلینو د نوموړو اسنادو په هکله هر اړخیز معلومات وړاندې کړل او خپل اندونه یې د هغه د لا غوره پلي کولو په هکله شریک کړل.
د ناستې په دوام کې، د پنځو راتلونکو کلونو لپاره د اوبو د پراختیایي پروژو د لیست ترتیبولو موضوع تر څېړنې لاندې ونیول شوه او پریکړه وشوه، چې پروژې دې د ملي لومړیتوبونو، ساحوي اړتیاوو او د اوبو او انرژي وزارت د ستراتېژیکو موخه سره سم ترتیب شي.
د اوبو محترم معین د ګډونوالو د اندونو او وړاندیزونو د اورېدلو ترڅنګ، د ریاستونو ترمنځ پر همغږیو، له تخنیکي او تقنیني اسنادو څخه د اغېزمنې ګټې اخیستنې او د راتلونکو پراختیایي پروژو لپاره پر کره برنامهریزۍ باندې ټینګار وکړ.
