د اوبو او انرژي وزارت سرپرست وزیر د خپل ولایتي سفرونو په ترڅ کې د کندهار له والي سره وکتل
د ا.ا.ا د اوبو او انرژي سرپرست وزیر، ښاغلي ملا عبداللطیف"منصور" ولایتونو ته د خپل رسمي سفر په لړ کې تیر ماښام د کندهار له والي محترم حاجی یوسف "وفا" سره لیدنه وکړه.
دغه لیدنه چې په خورا صمیمانه فضا کې تر سره شوه،تر هر څه لومړی د ا.ا.ا دغو لوړ رتبه چارواکو له افغانستان څخه د امریکایی اشغال د ټغر د ټولیدو او د هیواد د بشپړې آزادي د بېرته اخیستلو او د اسلامي نظام د قیام او حاکمیت په مناسبت یو بل ته د مبارکي تاوده مراتب وړاندې کړل.
تر هغه وروسته یې د کندهار د سیندیزې حوزې د بندونو، پروژو او کارونو اړونده مسایلو باندې ګټورې خبرې وکړې او په دې لاره کې د شته ستونزو د حل او فصل په هکله یې له یو بل سره خپلې مشورې شریکې کړې.
په دغه لیدنه کې،پر دې برسیره یې د هیواد په تېره بیا د کندهار د سیندیزې فرعي حوزې د ریاست اړوند موضوعات تر بحث لاندې ونیول او دواړو خواو د هیواد د سترو ملي ګټو د تامین او د هیواد او هیوادوالو د پرمختګ او سوکالي په لاره کې یې د خپلو هڅو او کوششونو په لا زیاتولو ژمنه وکړه.
غونډه په خورا دوستانه او صمیمانه فضا کې پای ته ورسیده.
