اوبو او انرژي وزارت کې د پراختیایي پروژو د لویو قراردادونو د څېړلو کمېټې لومړۍ ناسته ترسره شوه
اوبو او انرژي وزارت کې د پراختیایي پروژو د لویو قراردادونو د څېړلو کمېټې لومړۍ ناسته ترسره شوه
د دې کمېټې په لومړي ناسته کې چې نن د اوبو او انرژي وزارت کې ترسره شوه، د اوبو او انرژي وزارت سرپرست وزیر ښاغلي ملا عبداللطیف منصور د افغانستان اسلامي امارت د کابینې شوری اوولسمې ګڼې پرېکړې د مصوبې څلورم بند ولوستل او د کمېټې څخه یې و غوښتل چې ترټولو د مخه خپل کړنلاره چمتو کړي او دهغې وروسته د مشخصي کړنلارې او میکانیسم سره سم د هغه لویو پروژو د قراردادونو په هکله چې تر دې مخکې د کورنیو او بهرنیو شرکتونو سره لاسلیک شوې دي، کار و کړې.
ښاغلي منصور د کمېټې د چارو پر چټکتیا باندې ټینګار وکړ او زیاته یې کړه چې کمېټه موظفه ده، څو د ټولو لویو پروژو د قراردادونو د کره کتنې او څېړلو وروسته، خپل وروستی راپور د ریاست لوزرا مقام ته وړاندې کړې.
دا کمېټه د افغانستان اسلامي امارت د کابینې د مصوبې پر اساس د ټولو لویو پراختیايي پروژو د قراردادونو د څېړلو ، بیاکتنې ، روڼتیا او د هغوی د ارزونې په موخه رامنځته شوي چې د هغې په راس کې د اوبو او انرژي وزارت سرپرست وزیر ښاغلی ملا عبداللطیف منصور قرار لري او د یادې کمېټې غړي د اوبو او انرژي وزارت تخنیکي مسؤلین، د تدارکاتو ملي اداره، د کلیو او پراختیا وزارت، د ټولګتو وزارت، د اقتصاد وزارت او نورې اړوندې ادارې تشکیلوي.
