د اوبو او انرژي وزارت د انرژي معین د SUNRAY ENERGY GROUP شرکت له استازو سره لیدنه ترسره کړه
د اوبو او انرژي وزارت د انرژي معین ښاغلي مولوي عارف الله عارف د خپل کار په دفتر کې د SUNRAY ENERGY GROUP شرکت له استازو سره لیدنه ترسره کړه او په هیواد کې يې د انرژي د پراختیا پروژو د پانګونې په هکله بحث او د نظر تبادله وکړه.
په دغه لیدنه کې،د یاد شرکت استازو په افغانستان کې د انرژي د تولید په پروژو کې له پانګونې سره لېوالتیا څرګنده کړه او په هېواد کې یې د انرژي د تولید د پروژو د تطبیق لپاره د زمینې په برابرولو کې د اوبو او انرژي وزارت د رهبري څخه د همکاري غوښتنه وکړه.
د اوبو او انرژي وزارت د انرژي معین ښاغلي مولوي عارف الله عارف په افغانستان کې د پانګونې په برخه کې د دغه شرکت د لېوالتیا هرکلی وکړ او یادونه یې وکړه چې په هېواد کې د انرژي د سکتور پراختیا د خصوصي سکتور همکاري او پانګونې ته اړتیا لري.
ښاغلي عارف د یاد شرکت استازو ته د پانګونې د زمینې په برابرولو کې د اوبو او انرژي وزارت د رهبري د همکاري ډاډ ورکړ او د عملي اقداماتو د پیل لپاره یې پر لا همغږي باندې ټینګار وکړ.