د ګلبهار ګروپ له پانګوالو سره د ډبرو سکرو څخه د برېښنا د تولید په پروژو کې د پانګونې په هکله تخنیکي غونډه ترسره شوه
یاده غونډه د اوبو او انرژي وزارت د دفتر عمومي رئیس ښاغلي قاري محمد عبدالعزیز "عزیز" په مشري د انرژی څانګې د رئیسانو او د ګلبهار ګروپ د استازو په ګډون ترسره شوه.
په یاده غونډه کې د ډبرو سکرو له سرچینو څخه د برېښنا د تولید په پروژو کې د پانګونې په هکله بحث او د اندونو تبادله وشوه او د دواړو لورو ترمنځ اړین تخنیکي معلومات شریک شول.
د اوبو او انرژي وزارت د دفتر عمومي رئيس د دواړو لورو د مسئولينو ترمنځ پر لا زیاتې همغږي او د چارو پر چټکتيا باندې ټينګار وکړ.
د يادونې وړ ده، چې دوې ورځې مخکې د ګلبهار ګروپ استازو، د اوبو او انرژي وزارت له سرپرست وزیر سره په لېدنه کې د ډبرو سکرو څخه د برېښنا د توليد په پروژو کې پانګونې ته لېوالتيا څرګنده کړه او له هغوی سره یې د وزارت د رهبري مقام او تخنیکي ټیم له لوري د همکاري ژمنه وکړه.
