د میمنې ښار د اوبو پلورونکو ته د ځمکې لاندې اوبو د بې ځایه ګټې اخیستنې د مخنیوي په هکله اړینې سپارښتنې وشوې
د شیرین تګاب میمنې سیندیزې فرعي حوزې رئيس محترم مولوي محي الدین مبارز او ورسره مل د نوموړي ریاست مسؤلینو د میمنې ښار د اوبو پلورونکو له ځایونو څخه لیدنه وکړه او هغوی ته یې د ځمکې لاندې اوبو د بې ځایه ګټې اخیستنې د مخنیوي په هکله اړینې سپارښتنې وکړې.
په ورته مهال، د میمنې ښار اوبو پلورونکو ژمنه وکړه، چې یادې شوې سپارښتنې به عملي کړي او د اوبو د ضایعاتو د مخنیوي په برخه کې به د اوبو او انرژي وزارت د اوبو له کړنلارې سره سم عمل وکړي.
همدارنګه د نوموړې حوزې مسؤلینو د ګرزیوان د ولسوال او د نوموړي ولسوالي د یو شمېر نورو مسؤلینو په شتون کې له اوبو څخه د بې ځایه ګټې اخیستنې د مخنیوي په هکله یوه ناسته ترسره کړه او له اوبو څخه د بې ځایه ګټې اخیستنې پر مخنیوي باندې ټینګار وشو.
