اوبو او انرژي سرپرست وزیر د حفاظ کرامو د فراغت غونډې ته وینا وکړه.
د اوبو او انرژي وزارت سرپرست وزیر محترم الحاج ملا عبداللطیف منصور نن د پکتیا ولایت مرکز ګردېز اړوند د ابراهیم خېلو په نجم المدارس کې د قران کریم د حفاظ کرامو د فراغت هغې غونډې ته چې ګڼ شمېر علماء کرامو او د سیمې متدینو خلکو پکې ګډون کړی وو، وینا وکړه. محترم وزیر صاحب د خپلې وینا په ترڅ کې د دیني علومو د زده کړې او قران کریم د حفظ د فضیلت په هکله وینا وکړه، وروسته يې د غونډې برخه والو ته د افغانستان د اسلامي امارت د سیاسي او اقتصادي پرمختګونو په هکله مفصل معلومات وړاندې کړل. محترم وزیر صاحب په هېواد کې د اسلامي نظام قیام یو لوی الهي نعمت و باله او له خلکو څخه یې و غوښتل چې ددغه الهي نعمت شکر ادا کړي او له دغه نظام څخه هر اړخیز ملاتړ وکړي. محترم منصور صاحب دغه راز له علماوو څخه و غوښتل چې د دیني علومو د تدریس او ترویج په لاره کې خپل دروند مسئولیت ادا کړي .دغه راز محترم وزیر صاحب د پکتيا ولایت د زرمت ولسوالي د خاتم الانبیأ دارالایتام د الفتح جومات د عملي چارو د پیل په مراسمو کې هم ګډون وکړ.یاده دې وي چې د یاد جومات د بنسټ ډبره څه موده وړاندې د افغانستان د اسلامي امارت د اقتصادي مرستیال محترم الحاج ملا برادر اخند او محترم منصور صاحب په لاس اېښودل شوې وه .یاد جومات به له ټولو ملحقاتو سره په پاخه او اساسي ډول د نژدې څلور سوه زره امریکایي ډالرو په لګښت جوړېږي.
