اوبو او انرژي وزارت کې د ۱۴۰۳ هـ ل کال د کړنو د ارزونې او د ۱۴۰۴ هـ ل کال لپاره د پلان چمتوکولو په هکله د همغږي ناسته ترسره شوه
دغه ناسته د اوبو او انرژي سرپرست وزیر محترم الحاج ملا عبداللطیف منصور تر رهبري لاندې د اوبو معین محترم مجیب الرحمن عمر آخندزاده، مرکزي رئيسانو او د پنځو عمومي سیندیزو حوزو د رئيسانو په شتون کې ترسره شوه.
د اوبو او انرژي سرپرست وزیر د دغې ناستې تر سره کول په ۱۴۰۳ هـ ل کال کې د وزارت د کړنو د ارزولو، د پراختیایي بودجې د مصرف د څرنګوالي او په ۱۴۰۴ هـ ل کال کې د دغه وزارت د کړنو لپاره د یوه عملیاتي پلان چمتو کول وبلل.
د اوبو او انرژي سرپرست وزیر د دغه وزارت لاسته راوړنې او کړنې په ځانګړې توګه د اوبو او انرژي پراختیایي پروژو د پلي کولو په برخه کې وستایلې او ټینګار یې وکړ، چې اړتیا ده د وزارت د کړنو د پرمخ وړلو په موخه د راتلونکي کال لپاره یو روښانه او عملي پلان چمتو شي، ترڅو په راتلونکي کال کې د پروژو د پلي کولو چارې له هغه سره سم پرمخ یووړل شي.
د یادونې وړ ده، چې د ناستې په بهیر کې د عمومي سیندیزو حوزو او مرکزي رئیسانو د خپلو کړنو په هکله اړین معلومات وړاندې کړل او وروسته د ستونزو د هوارولو، د چارو د غوره ترسره کولو او د راتلونکي کال لپاره د هر اړخیز پلان د چمتو کولو په هکله بحث او د اندونو تبادله وشوه.
