اړېن وضاحت
په دي وروستیو کې یو شمیر کړیو له لورې په رسینو کې پر حکومت نېوکه کیږي چي ګواکې د ایران سره یې د هلمند اوبو پر سر کومه پټه او ناوړه معامله کړې.
د اوبو چارو د تنظیم ملي اداره په دي اړه خپل دریځ داسي اعلانوي:
افغانستان له ایراني لوري سره د هلمند اوبو پر سر په کال ۱۹۷۳ د صدراعظم شهید محمد موسی شفیق په مشری تړون رامنځته کړ چي نوموړی قرارداد د وخت پارلمان له لوري تصویب او د نړېوالو حقوقي قواعدو پر اساس نړېوال تړون بلل کیږي. دمګړۍ، د هلمند اوبو تړون مرعی الاجرا دی او افغانستان د نړېوالو نورمونو او اصولو له مخې د تړون عملي کولو ته ژمن دی.
له بل اړخه افغان حکومت له بل هر وخت اوس ډیر، د خپلو طبیعي منابعو، په ځانګړې توګه د اوبو منابعو مدیریت ته ژمن دی او هڅه کوي چي دا توکۍ د هېواد دوامداره پراختیا او سوکالۍ په موخه ورڅخه اعظمي ګټه پورته کړي.
د اوبو چارو تنظیم ملي اداره خپلو هېوادوالو ته ډاډ ورکوي چي حکومت، په ځانګړې توګه دا اداره به د هېواد لویې ګټې، ملي مصالح، نافذه قوانین، د خپلو خلکو سوکالي او اقتصادي ټیکاو ته لومړېتوب ورکول د خپلو اجراآتو او کړنو سرلارۍ ګرځوي او هیڅکله به د خپلو اوبو (بی بدیله ماده) پر سر په هیڅ صورت او له هیڅ لوري سره معامله ونه کړي اونه به هم چاته د معامله کولو اجازه ورکړی.
د افغانستان دښمنان تل هڅه کوي چي د افغانستان د اسلامي جمهوریت او نظام کمزوري کولو لپاره هر ډول وسیله وکاروي. د حکومت پرضد بیځایه تبلیغات او پروپاګندا د دوی د شومو اهدافو یوه وسیله چي وکولای شي له دي لارې پر نظام د خلکو بي باروۍ ته لمن ووهي او د کمزوري کولو له لارې یې خپلو ناروا موخو ته ورسیږي.
مونږ باوري یو چي افغان ولس به هیڅکله د دښمن په تبلیغاتو نه تیروځي او همېش به د خپل نظام ټینګښت او پایښت په موخه نه ستړې کېدونکې هلې ځلې کوي.
