خوست ولایت کې د نرګیسۍ چکډم د جوړېدو چارې د څه باندې دوه میلیونه افغانیو په لګښت پیل شوې

د خوست ولایت د علیشرو او تریزایې ولسوالي اړوند د قدمو سیمې نرګیسۍ چکډم د جوړېدو چارې د دوه میلیونه، یو سلو درې دیرش زره او اته سوه نولس(2133819) افغانیو په لګښت د خوست شمل خرم سیندیزې فرعي حوزې رئیس محترم مولوي عبدالقیوم ثابت او ورسره مل تخنیکي ټیم، د علیشیرو او تریزایې ولسوال او یو شمیر نورو سیمه ییزو مسئولینو او قومی مشرانو په شتون کې پیل شوې.

د خوست شمل خرم سیندیزې فرعي حوزې رئیس د دغې پروژې د چارو د پرانیستې پر مهال د ځمکې لاندې اوبو د پیاوړتیا او د کرنیزو ځمکو د خړوبولو په برخه کې د یاد چکډم ارزښت ته په اشارې سره د یادې سیمې له اوسیدونکو څخه وغوښتل، چې د نوموړې پروژې د لاغوره پلي کولو او ساتنې په برخه کې دې له اړوندو مسئولینو سره همکاري وکړي.

یاد چکډم د اوبو او انرژي وزارت په مالي لګښت د 25 متره په اوږدوالي، د تهداب په شمول د 6.5 متره په لوړوالي، په تهداب کې د 4.5 متره او په سر کې د 80 سانتي متره سور سره جوړیږي، چې پکې به لسګونو کسانو ته د کار زمینه چمتو شي، د (0.95) کیلومتره آبګیر ساحې په درلودلو سره شاوخوا 4500 متره مکعب اوبه به زیرمه، په کلني ډول د شاوخوا 2300 متره مکعب په اندازه د ځمکې لاندې اوبه تغذیه او لسګونه جریبه کرنیزې ځمکې خړوبې شي.