دوه تنه عراقي پانګوالو د اوبو او انرژي وزارت له سرپرست سره په لیدنه کې په افغانستان کې له نوي ټکنالوژي څخه په استفادې سره د انرژي پروژو په تولید کې د پانګونې لپاره لېوالتیا وښوده.
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د عراق هېواد له پانګوالو محترم احمد حامد سعید او یو بل تن سره خبرې اترې وکړې.
پهٔ دغهٔ لیدنه کې، عراقي پانګوالو د اوبو او انرژي وزارت سرپرست ته د برېښنا د تولید لپاره یوه داسې نوې دستګاه معرفي کړه چې په دې وروستیو کې د هغوئ له لورې اختراع شوې او د برېښنا د تولید لپاره سرچینو ته اړتیا نلري، بلکې د تېلو، ګاز، اوبو او نورو له اړتیا پرته برېښنا تولیدوي، او ليوالتیا یي وښوده چې غواړي په افغانستان کې د دغې نوې ټکنالوژي څخه په استفادې سره پانګونه وکړي.
د اوبو او انرژي سرپرست وزیر له دغه نوښت او په افغانستان کې د انرژي پراختیا لپاره د هغوی د لېوالتیا هرکلی وکړ او ټینګار یې وکړ چې دغه وزارت د دغې پانګونې لپاره د همکاري او اړینو زمینو د برابرولو لپاره تیار دی.
دغه لیدنه د بهرنیو پانګونو د جلب او د افغانستان د انرژي په پراختیا کې د نوي ټکنالوژي د کارولو لپاره ترسره شوه.
