د انرژي معینیت اداري ناسته د یاد معینیت د یو شمېر اړینو موضوعاتو د څېړلو په موخه ترسره شوه
یاده ناسته د وزارت د دفتر عمومي رئيس او د انرژي معینیت وارسي کوونکي محترم قاري محمد عبدالعزیز عزیز تر مشري لاندې د رئيسانو او د یاد معینیت د ټولو تخنیکي مسؤلینو په شتون کې ترسره شوه.
په دې ناسته کې د څو اړینو موضوعاتو په ځانګړې توګه د هېواد انرژي سکتور د پراختیا پنځه کلن پلان مسودې په هکله چې په هېواد کې د متوازنې انرژي د تنظیم، پراختیا، ودې، تولید، وېش او لېږد په موخه ترتیب شوې او د پنځه کلن پلان تر کره کتنې او وروستي کولو وروسته به د عملیاتي یا اکشن پلان په ترتیبولو باندې کار پیل شي، بحث او د اندونو تبادله وشوه.
د ناستې په دوام کې په تېر یوه کال کې د انرژي معینیت د ریاستونو د کړنو د ارزونې په هکله هر اړخیز بحثونه و شول. د یادونې وړ ده، چې د انرژي معینیت ټولې کړنې به په اونیز، میاشتنې او ربعوار ډول د فیصدي پر بنسټ و ارزول شي.
محترم قاري محمد عبدالعزیز عزیز د وزارت د دفتر عمومي رئيس او د انرژي معینیت وارسي کوونکي د ناستې د غړو د اندونو تر آورېدلو وروسته، د انرژي سکتور د پراختیا پنځه کلن پلان د وروستي کولو پر چټکتیا باندې ټینګار وکړ او اړوندو مسؤلینو ته یې مشخصې دندې وسپارلي.
