د انرژي معینیت تخنیکي او اداري ناسته ترسره شوه
دغه ناسته د انرژي معین محترم الحاج ملا عبدالهادي یعقوب تر رهبري لاندې د انرژي سکتور د رئيسانو، سلاکارانو او تخنیکي مسؤلینو په شتون کې ترسره شوه.
په دغه ناسته کې، د انرژي سکتور اړوند بېلابېلو موضوعاتو په ځانګړې توګه د انرژي پنځه کلن پراختیایي پلان د پراختیا او پلي کولو د څرنګوالي، په انرژي سکتور کې د اړوندو وزارتونو او ادارو ترمنځ د همکاري هوکړه لیک مسودې د چمتو کولو او د خواجه الوان دښتې د کابل تر ارغندۍ پورې د ۵۰۰ کیلو ولټ مزي پروژې چارو د چټکتیا په موخه د ننګونو د هوارولو په هکله بحث او د اندونو تبادله وشوه.
د انرژي محترم معین د رئيسانو د راپورونو او اندونو تر ارزولو وروسته، په هېواد کې د انرژي د پراختیا چارو د انسجام، تنظیم او غوره ترسره کولو په موخه اړوند رئيسانو او تخنیکي مسؤلینو ته اړینې سپارښتنې وکړې.
