د انرژي معینیت د نویو پروژو د لا غوره پلي کولو په موخه د یاد معینیت فوق العاده او تخنیکي غونډه ترسره شوه
د انرژي معینیت وارسي کوونکی او د دفتر عمومي رئیس محترم قاري محمد عبدالعزیز عزیز، د یاد معینیت د رئیسانو، سلاکارانو او تخنیکي مسئولینو سره په یوه فوق العاده غونډه کې د انرژي سکتور د نویو پروژو د لا غوره پلي کولو په هکله بحث او د اندونو تبادله وکړه.
په دې غونډه کې د انرژي د نویو پروژو چې له پیل څخه تر بشپړیدو پورې د پلي کولو او مدیریت مسئولیت یې د انرژي معینیت پر غاړه لري، بحث ترسره شو او اړین تدابیر ونیول شول.
همدارنګه، پریکړه وشوه چې، په راتلونکي کې دې د هېواد د انرژي پروژو سروې، ډیزاین او مدیریت د انرژي معینیت اړوند تخنیکي بورډ له لوري په تخنیکي او مسلکي توګه ترسره شي.
د غونډې په دوام کې، د انرژي سکتور د قوت د ټکو د پیاوړي کولو، د پروژو د سروې، ډیزاین او څارنې په برخه کې له شته وړتیاو څخه د سمې ګټې اخیستنې، د نیمګړتیاوو د پېژندلو او د هېواد د انرژي سکتور پر وړاندې ستونزو او ننګونو ته د مناسبو حل لارو رامنځته کولو په هکله هم بحث ترسره شو.
د غونډې په ترڅ کې د برېښنا د انرژي سکتور مسئولینو او انجنیرانو خپل وړاندیزونه وړاندې کړل او ژمنه یې وکړه چې د چارو په ترسره کولو کې به لا زیاتې هڅې وکړي.
په ورته مهال، د انرژي معینیت وارسي کوونکي او د دفتر عمومي رئیس د هرې موضوع د هوارولو په هکله اړینې سپارښتنې وکړې او د چارو په ترسره کولو کې یې پر لا زیاتو هلو ځلو باندې ټینګار وکړ.
