د انرژي معینیت په اونیزه اداري او تخنیکي ناسته کې د دغه معینیت اړوند د یو شمېر موضوعاتو په هکله خبرې، اترې وشوې
د اوبو او انرژي وزارت د انرژي معینیت اونیزه اداري او تخنیکي ناسته د دغه وزارت د انرژي معین محترم الحاج ملا عبدالهادي یعقوب تر رهبري لاندې د نوموړي معینیت د رئيسانو، سلاکارانو او یو شمېر تخنیکي مسؤلینو په شتون کې ترسره او د دغه معینیت اړوند د یو شمېر موضوعاتو په هکله بحث او د اندونو تبادله وشوه.
په دغه ناسته کې، د تېرې ناستې پرېکړو ته د کتنې ترڅنګ، د ام، جی، اې، ام شرکت له لوري د باغدرې برېښنا بند د امکان سنجۍ مطالعاتو مودې غځولو د غوښتنې او د انرژي انجنیري چوپړتیاوو رئيس او ورسره مل پلاوي چین هېواد ته د باغدرې برېښنا بند د ډبرو د آزمایښت له پروسې څخه د څارنې د لومړني راپور په هکله خبرې، اترې وشوې .
د انرژي محترم معین د نوموړو موضوعاتو په هکله د رئيسانو، سلاکارانو او تخنیکي مسؤلینو د اندونو او وړاندیزونو تر اورېدلو وروسته، اړوندو مسؤلینو ته د چارو د چټکتیا او غوره پرمخ وړلو په موخه اړینې لارښوونې وکړې او په دې هکله اړین تصمیمونه ونیول شول.
