د انرژي معین د باغدرې برېښنا بند د قراردادي شرکت له مسؤلینو سره وکتل
د اوبو او انرژي وزارت د انرژي معین محترم الحاج ملا عبدالهادي یعقوب د خپل کار په دفتر کې د دغه معینیت د یو شمېر رئیسانو او تخنیکي مسؤلینو په شتون کې د کاپیسا ولایت د باغدرې برېښنا بند د قراردادي شرکت( ام، جې، اې، ام) له اداري مرستیال ښاغلي مسټر ډینګ او مل پلاوي سره وکتل او د نوموړي بند د جیوفزیک او جیوتخنیک مطالعاتو د چارو په هکله بحث او د اندونو تبادله وکړه.
په دغه لیدنه کې، د نوموړي شرکت مسؤلینو د نوموړي بند د جیوفزیک او جیوتخنیک مطالعاتو چارو د څرنګوالي او پرمختګ په هکله اړین معلومات د انرژي محترم معین ته وړاندې کړل او زیاته یې کړه، چې دغه شرکت هوډ لري، د وزارت درې تنه انجینران د وړتیا لوړولو په موخه چین هېواد ته ولېږي.
په ورته مهال، د انرژي محترم معین د باغدرې برېښنا بند د جیوفزیک اوجیوتخنیک مطالعاتو چارو د پرمختګ په هکله د خوښي څرګندولو ترڅنګ په دې برخه کې د نوموړي شرکت مسؤلینو ته د همکاري ډاډ ورکړ، او د نوموړي شرکت له لوري چین هېواد ته د وړتیا لوړولو په موخه د دغه وزارت د درې تنو انجنیرانو د لېږلو د هوډ هر کلی وکړ.
د دغې ناستې په پای کې د باغدرې برېښنا بند د جیوفزیک او جیوتخنیک مطالعاتو چارو پر لا چټکتیا باندې ټینګار وشو.
