د اوبو اوانرژي وزارت سرپرست وزیر د پکتیا ولایت د زرمت ولسوالي له قومي مشرانو سره وکتل
د اوبو او انرژي وزارت سرپرست وزیر ښاغلي ملا عبداللطیف منصور د پکتیا ولایت د زرمت ولسوالي له قومي مشرانو سره وکتل او په یاده لېدنه کې د زرمت ولسوالي اړوند د پروژو د تطبیق او ستونزو د حل په هکله خبرې اترې وکړې.
په یاده لېدنه کې د زرمت ولسوالي قومي مشرانو خپلې ستونزې او وړاندېزونه د اوبو او انرژي وزارت د رهبري سره شریکې کړې او د پروژو د تطبیق او د پکتیا ولایت مرکز ته د زرمت ولسوالي د سړک د ستونزو د حل غوښتنه یې وکړه.
په دې لېدنه کې د اوبو او انرژي وزارت سرپرست وزیر د اسلامي امارت د مجاهدینو سره د زرمت ولسوالي د خلکو د دوامداره همکاریو، مرستو او هڅو ستاینه وکړه او په راتلونکې کې هم د زرمت خلکو د دوامداره همکاري غوښتنه يې وکړه. ښاغلي منصور د یادې ولسوالي قومي مشرانو ته ډاډ وکړ چې دغه وزارت په خپل راتلونکې پلان کې په پکتیا ولایت کې د اوبو بندونه پلې کوي چې د پنځه بندونو له جملې څخه د دوو بندونو سروې او تخنیکي چارې یې پای ته رسیدلې او ژر به یې کارونه پیل شي.
