د اوبو او انرژي سرپرست وزير د خاتم الانبیأ دارالایتام شاګردانو ته اختریزې ډالۍ وویشلې.
د اوبو او انرژي سرپرست وزير محترم الحاج ملا عبداللطیف منصور په هغه غونډه کې چې نن د پکتیا ولایت زرمت ولسوالي د خاتم الانبیأ دارالایتام په انګړ کې جوړه شوې وه، ګډون او وینا وکړه.
دغه غونډه چې پکې د زرمت ولسوال، امنیه قوماندان، علماوو، د یاد دارالایتام استادانو، زدهکوونکو او د سیمې ګڼ شمېر اوسېدونکو برخه درلوده ،محترم وزیر صاحب د دیني زدهکړو د اهمیت ، افادیت او اړتیا ،د یتیمانو د پالنې او روزنې ،په ټولنه کې د علماوو د ارزښت او د هغوی د دیني او دنیوي دارنه مسئولیت په هکله هر اړخیزه وینا وکړه.
محترم وزیر صاحب د یاد دارالایتام زدهکوونکي هم د علم او پوهې تر لاسه کولو په لاره کې زیار اېستلو،په ټولنه کې د خپل حیثیت او مقام ساتلو ،د استادانو او مشرانو درناوي کولو ، له خپلو هم درسانو سره نېک چلند کولو او راتلونکو دیني او هېوادنیو مسئولیتونو ته متوجه کړل او دوی ته یې اړینې او ګټورې توصیې وکړې.
په پای کې د یاد دارالایتام شاګردانو ته هغه اختریزې ډالۍ وویشل شوې، چې د محترم وزیر صاحب لخوا دوی ته برابرې شوې وې.
غونډه د دعائیې په لوستلو سره پای ته ورسیده.
