د اوبو او انرژي سرپرست وزیر د ایران هېواد د سفارت له سرپرست سره د دواړو هېوادونو ترمنځ د دوه اړخیزو همکاریو د پراختیا په هکله بحث او د اندونو تبادله وکړه
د افغانستان اسلامي امارت د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د ایران اسلامي جمهوریت د سفارت له سرپرست محترم علي رضا بیکدلي سره وکتل.
په دغه لیدنه کې، دواړو لورو د دواړو هېوادونو ترمنځ د ښو همکاریو د مخنې یادونه وکړه او د هغه د پراختیا او دوام په ځانګړې توګه په افغانستان کې د اوبو او انرژي پراختیایي پروژو په پلي کولو باندې ټینګار وکړ.
د اوبو او انرژي سرپرست وزیر د ایران اسلامي جمهوریت سفیر ته ډاډ ورکړ، چې اوسمهال په افغانستان کې له هره پلوه د پانګونې لپاره زمینه چمتو ده او اسلامي امارت هم د پراختیایي او اقتصادي همکاریو د پراختیا په ځانګړې توګه له ګاونډیو هېوادونو سره یې هر کلی کوي.
په ورته مهال، د ایران اسلامي جمهوریت سفیر هم په دغه لیدنه کې څرګنده کړه، چې ایران هوډ لري چې له افغانستان سره د اوبو او انرژي د پراختیایي پروژو د پلي کولو په برخه کې همکاري وکړي.
همدارنګه، په دغه لیدنه کې د دواړو هېوادونو ترمنځ د همکاریو په پراختیا باندې د ټینګار ترڅنګ د اوبو د کموالي او وچکاليو د مسائلو په هکله هم بحث او د اندونو تبادله وشوه.
