د اوبو او انرژي سرپرست وزیر په تهران کې د افغانستان د اسلامي امارت د سفارت له سرپرست سره وکتل
د اوبو او انرژي سرپرست وزیر محترم الحاج ملا عبداللطیف منصور او ورسره مل پلاوي ایران هېواد ته د خپل سفر په ترڅ کې نن په تهران کې د افغانستان د اسلامي امارت د سفارت له سرپرست محترم مولوي فضل احمد حقاني او د دغه سفارت له یو شمېر ډیپلوماټانو سره وکتل.
په پيل کې، په تهران کې د افغانستان د اسلامي امارت د سفارت سرپرست د اوبو او انرژي سرپرست وزیر او مل پلاوي ته ښه راغلاست ووایه او زیاته یې کړه، چې نن افغان ولس خپل په زړه پورې نظام لاسته راوړی او شپه او ورځ هڅه کوو چې خپل ولس ته په رښتیني توګه خدمتونه وړاندې کړو او په ایران کې د افغان کډوالو ستونزو ته په وخت سره رسیدګي وکړو.
په ورته مهال، د اوبو او انرژي سرپرست وزیر ایران هېواد ته د خپل سفر په تړاو وویل چې د افغانستان د اسلامي امارت مشران هڅه کوي چې د اوبو او برېښنا په برخه کې له ګاونډیو هېوادونو سره ښه او حسنه اړیکې ټینګې کړي او په دې برخه کې یې خپلې ټولې هڅې په کار اچولې دي.
