د اوبو او انرژي وزارت او د افغان پامیر اکسوس(اپک) ترمنځ د انرژي په پروژو کې د پانګونې په موخه د همکاري هوکړه لیک لاسلیک شو
د اوبو او انرژي سرپرست وزیر محترم الحاج ملا عبدللطیف منصور د افغان پامیر اکسوس (اپک) شرکت له رئيس محترم سید محمد هاشم حسینی سره د انرژي په پروژو کې د پانګونې په موخه د همکاري هوکړه لیک لاسلیک کړ.
له دغه هوکړه لیک سره سم نوموړی شرکت په افغانستان کې له بېلابېلو سرچینو څخه د انرژي د تولید په پروژو کې د انتقالي مزو، د سب سټیشنونو جوړونه او پياوړتیا په برخه کې پانګونه پيلوي او د اوبو او انرژي وزارت له نوموړي شرکت سره د پانګونې لپاره د زمینې د چمتو کولو په برخه کې همکاري کوي.
د اوبو او انرژي سرپرست وزیر د دغه هوکړه لیک د لاسلیک کولو پر مهال په هېواد کې د انرژي د پراختیا ارزښت ته په اشارې سره د پانګونې د چارو د پرمخ وړلو پر چټکتیا او د عملي اقداماتو پر پیل باندې ټینګار وکړ.
په ورته مهال، د نوموړي شرکت مسؤلینو هم ژمنه وکړه، چې خپل فعالیتونه د دغې پانګونې په برخه کې ګړندي کوي او په راتلونکي کې په ډېر ژر شوني وخت کې به خپلې عملي چارې پیل کړي.
