د اوبو او انرژي وزارت او د عوفي بهرام شرکت ترمنځ د لمریزې برېښنا د دریو پروژو هوکړه لیکونه لاسلیک شول
د اوبو او انرژي سرپرست وزیر محترم الحاج ملا عبداللطیف منصور د عوفي بهرام د کانونو را اېستلو او پروسس شرکت له رئيس محترم حاجي پهلوان سره د کابو ۲۵ میلیونه ډالرو په ټولیز ارزښت په پکتیکا، ارزګان او فراه ولایتونو کې د لمریزې برېښنا د دریو پروژو هوکړه لیکونه لاسلیک کړل.
د اوبو او انرژي سرپرست وزیر د دغو هوکړه لیکونو په لاسلیک غونډه کې د اوبو او انرژي حیاتي پروژو ته په اشارې سره وویل چې له نېکمرغه دغه وزارت په دواړو سکتورونو کې د پام وړ فعالیتونه ترسره کړي او د اوبو د مدیریت او د انرژي د پراختیا په برخه کې ښې لاسته راوړنې لري.
په ورته مهال، د عوفي بهرام شرکت مرستیال محترم حاجي نورالله د دغې غونډې په بهیر کې په ټاکلي وخت او ښه کیفیت سره د پروژو د چارو په ترسره کولو کې ژمنه وکړه او زیاته یې کړه، چې مونږ هڅه کوو چې نورو پانګوالو ته هم په افغانستان کې د پانګونې لپاره بلنه ورکړو.
د یادونې وړ ده، چې د دغو پروژو په پلي کولو سره په ټوله کې ۸میګاواټه لمریزه برېښنا یعني ۲ میګاواټه په پکتیکا، ۳ میګاواټه په ارزګان او ۳ میګاواټه په فراه ولایت کې تولید کېږي چې زرګونه کورنۍ به ورڅخه برخمنې شي.
