د اوبو او انرژي وزارت د انرژي معین د ترکیې هېواد د یو نړیوال پوهنتون له دوو پروفیسورو استادانو سره وکتل

د اوبو او انرژي وزارت د انرژي معین ښاغلي مولوي عارف الله عارف د خپل کار په دفتر کې د(KUTAHYA DUMLUPINAR UNIVERSITY)  نړیوال پوهنتون له دوو استادانو ښاغلي پروفیسور ډاکټر سیحمورات اریک  (D.Sahmorat ARIK) او ښاغلي پروفیسور ډاکټر محمد یونس سیسمن  (D.M. Yunus SISMAN ) سره وکتل.

په یاده لیدنه کې،  د یاد پوهنتون استادانو له بېلابېلو سرچینو څخه د انرژي د تولید په برخه کې د خپلو کړنو په اړه اړین معلومات د انرژي له معین سره شریک کړل او د افغانستان د اوبو او انرژي وزارت سره په همغږي د ترکیې هېواد له پانګوالو ، د وزارت انجینرانو د مسلکي پوهې پیاوړتیا او په نورو برخو کې د همکاري لیوالتیا څرګنده کړه.

په ورته وخت کې، د انرژي معین ښاغلي مولوي عارف یادو پروفیسورانو ته د ښه راغلاست ترڅنګ له دغه وزارت سره د ګډو همکاریو په برخه کې د دوی له لیوالتیا څخه مننه وکړه او ډاډ یې ورکړ چې د اوبو او انرژي وزارت رهبري د ګډو همکاریو لپاره زمینه چمتو کوي.

د انرژي معین د یاد پوهنتون همکاري د افغان انجنیرانو د لا مسلکي زده کړو د ترلاسه کولو لپاره یو ښه فرصت و باله او له هغوی څخه و غوښتل چې د دغه وزارت د انجنیرانو لپاره د بورسونو د چمتو کولو په برخه کې همکاري وکړي؛ ترڅو انجنیران د برېښنا د تولید په برخه کې د اوبو، باد، لمر او ډبرو سکرو سرچینو د لا زیاتې مسلکي زده کړو لپاره هغه پوهنتون ته ولېږل شي.