د اوبو او انرژي وزارت د اوبو معین د ۷۷ ترکي شرکت له عمومي رئيس سره وکتل
د اوبو او انرژي وزارت د اوبو معین محترم مجیب الرحمن عمر آخندزاده د خپل کار په دفتر کې د ۷۷ ترکي شرکت له عمومي رئيس محترم سلیمان جیلیو سره وکتل او په افغانستان کې د اوبو د مدیریت د پروژو د پلي کولو په برخه کې د دوو اړخیزو همکاریو د دوام او پراختیا په هکله یې خبرې، اترې وکړې.
په دغه لیدنه کې، د اوبو معین په افغانستان کې د اوبو د مدیریت ارزښت ته په اشارې سره څرګنده کړه، چې په اوسنیو شرایطو کې په دې برخه کې د پروژو پلي کول د دغه هېواد له بنسټیزو اړتیاوو څخه ده.
ښاغلي عمر آخندزاده د ۷۷ ترکي شرکت له رئيس څخه وغوښتل چې د اوبو د مدیریت په پروژو کې خپلې پانګونې ته دوام او پراختیا ورکړي.
په ورته مهال، د نوموړي شرکت رئيس هم د اوبو په پروژو کې لا زیاتې پانګونې ته لېوالتیا څرګنده کړه او په دې برخه کې یې د خپلې همکاري په هکله د اوبو معین ته ډاډ ورکړ.
