د اوبو او انرژي وزارت د اوبو معین ملګرو ملتونو د یونیسف (UNICEF) ادارې د اوبو د برخې له مسؤل سره د اوبو د مدیریت په برخه کې د همکاري د پياوړتیا په هکله خبرې وکړې
د اوبو او انرژي وزارت د اوبو معین محترم مجیب الرحمن عمر آخندزاده د خپل کار په دفتر کې په افغانستان کې د ملګرو ملتونو د یونیسف (UNICEF)ادارې د اوبو د برخې له مسؤل ښاغلي ډامنیک سره وکتل. په دغه لیدنه کې دواړو لورو د اوبو د مدیریت په برخه په ځانګرې توګه آسیب پذیرو سیمو کې د څښاک اوبو د ګډو همکاریو د پياوړتیا په هکله بحث او د اندونو تبادله وکړه.
په دغه لیدنه کې، د اوبو معین په هېواد کې د وچکالي او د اقلیمي بدلونونو اغېزو ته په اشارې سره پر دې ټکې باندې ټینګار وکړ، چې په افغانستان کې د اوبو مدیریت او د اوبو رسولو پروژو پلي کول د نړیوالو بنسټونو همکاریو ته اړتیا لري؛ ترڅو څښاک اوبو ته اړمنې سیمې د خدماتو تر پوښښ لاندې راوستل شي. هغه په دې برخه کې د ملګرو ملتونو د یونیسف (UNICEF) ادارې همکارۍ وستایلې او د دغو همکاریو په پراختیا او دوام باندې یې ټینګار وکړ.
په ورته مهال، د یونیسف (UNICEF) ادارې د اوبو د برخې مسؤل هم د اوبو د مدیریت په برخه کې د همکاریو پراختیا او دوام باندې ټینګار وکړ، او یادونه یې وکړه چې یونیسف هوډ لري په دې برخه کې خپل فعالیتونه پراخ کړي.
