د اوبو او انرژي وزارت د اوبو په معینیت کې د سترو قراردادونو د څېړلو ناسته ترسره شوه
دغه ناسته د اوبو او انرژي وزارت د اوبو معین محترم مجیب الرحمن عمر آخندزاده، د ټولګټو وزارت معین محترم مولوي عبدالکریم فاتح، د کلیو بیارغونې او پراختیا وزارت معین محترم مولوي شرف الدین، د اقتصاد وزارت معین محترم ډاکټر عبداللطیف نظري، د چارو ادارې عمومي ریاست د ملي تدارکاتو مرستیال محترم شیخ عبدالرحیم رحیمي او د یو شمېر نورو وزارتونو او ادارو د استازو په شتون کې ترسره شوه.
په دغه ناسته کې، د اوبو او انرژي وزارت اړوند د هلمند ولایت د نهرالسراج کانال د وداني جوړولو لومړي لاټ پروژې تړون او د دوو توزیعي شبکو پروژو تړونونه، د ټولګټو وزارت د سړک جوړولو دوو پروژو تړونونه او د افغانستان برېښنا شرکت د څلورو انتقالي برېښنا مزو پروژو او سولري برېښنا فابریکې تړونونه تر څېړنې لاندې ونیول شول.
د ناستې په بهیر کې، د هر تړون په هکله په مفصله توګه بحث او د اندونو تبادله وشوه او د وزارتونو او اړوندو ادارو استازو د تړونونو د پلي کولو د پرمختګ وضعیت، ستونزو او شته ننګونو په هکله معلومات وړاندې کړل.
تر هر اړخیزې څېړنې وروسته، د ناستې د غړو له لوري اړینې پرېکړې ونیول شوې؛ ترڅو په یوه مفصل راپور کې د افغانستان د اسلامي امارت د اقتصادي کمېسیون سره شریک شي.
