د اوبو او انرژي وزارت د یو کلن لاسته راوړنو راپور د حکومت د رسنیو په مرکز کې وړاندې شو.
د اوبو او انرژي وزارت سرپرست الحاج ملا عبداللطیف منصور او د دغه وزارت یو شمېر نورو مسوولینو د حکومت د رسنیو په مرکز کې د یوه خبري کنفرانس په ترڅ کې د دغه وزارت د فعالیتونو او لاسته راوړنو په اړه راپور وړاندې کړ، هغه زیاته کړه چې دغه وزارت له تیر کال راهیسې تر اوسه پورې د اوبو د مدیریت په برخه کې، د اوبو د سرچینو پیژندل، د اوبو د سرچینو پراختیا او د اوبو د چارو تنظیمول،
او همدارنګه د انرژي د حکومتولۍ په برخو کې، د انرژي پروګرامونه، د انرژۍ خدماتو تنظیمول او په هیواد کې د بریښنا مارکیټ رامینځته کول. ترسره شوي او د پام وړ لاسته راوړنې لري.
د اوبو او انرژي سرپرست وزیر په خپلو خبرو کې یادونه وکړه چې په دې یوه کال کې د کمال خان، شاه او عروس او توري بندونو په ګډون په هېواد کې د اوبو لګولو او د برېښنا د تولید د څو لویو بندونو د جوړولو کار ښه پرمختګ کړی دی. د پاشدان بند، بخش اباد بند او د کجکي بند د تونلونو د جوړولو کار روان دی.
په هېواد کې د اوبو د ښه مدیریت او د اوبو د سرچینو د پیاوړتیا په موخه، د دغه وزارت له خوا په بېلابېلو ولایتونو کې د ۱۱۷ چک ډیمونو پروژې قرارداد شوې، چې ډېری یې بشپړې او ګټې اخیستنې ته سپارل شوې دي.
د هېواد په شمال کې د امو سیند د څنډو د تخريب د مخنيوي په موخه د هېواد په شمالي ولايتونو کې په لسګونه د څنډونو تحکیماتي پروژې پيل شوې، چې ډېرى يې بشپړې شوې او پر ځينو يې کار روان دى.
ښاغلي منصور په هېواد کې د انرژي د پراختیا اهمیت ته په اشارې سره وویل چې له نېکه مرغه له تېر یوه کال راهیسې تر اوسه د انرژي په برخه کې ډېر کارونه ترسره شوي او د یو شمېر لویو پروژو تړونونه لکه د ارغندي ۵۰۰ kV سب سټېشن پروژې د پاتې چارو هوکړه شوې ده، له دشت خواجه الوان څخه تر ارغندي کابل پورې د ۵۰۰ کیلو ولټه برېښنا د لېږد مزي او د دې پروژې اړوند د پنځو سب سټېشنونو او د برېښنا د لېږد لینونو تړونونه له پانګوالو سره لاسلیک شوي او عملي کار یې پیل شوی دی.
هغه زیاته کړه، په نغلو کې د لس میګاواټه لمریزې برېښنا پروژه بشپړه شوې او د هېواد په بېلابېلو ولایتونو کې له پانګوالو سره د لمریزې برېښنا د یو شمېر نورو پروژو تړونونه هم لاسلیک شوي دي.
په ورته وخت کې د اوبو او انرژۍ سرپرست وزیر ټینګار وکړ چې دغه وزارت د اوبو او انرژي د ښه مدیریت او د دغو دوو سکتورونو د پراختیا لپاره مشخص پنځه کلن پلانونه چمتو کړي چې په دې برخه کې ټولې پروژې په واضح ډول تعریف شوې دي. د نوموړو پروژې د پرله پسي تطبیق لپاره اسانتیاوې پیل شوې او هیواد به د خود کفایۍ خواته بوځي.
د دغه کنفرانس په پای کې د خبریالانو پوښتنو ته د مسؤولینو لخوا لازم ځوابونه ورکړل شول.
