د اوبو او انرژي وزارت سرپرست د چینایي شرکت (ایم سي سي ،ایم جي ایم) له رئیس سره د باغدرې بند د مطالعاتي پروژې د پرمختګ او د همکاریو پراخولو په اړه خبرې اترې وکړې.
محترم الحاج ملا عبداللطیف منصور، د اوبو او انرژي وزارت سرپرست، په خپل دفتر کې د چینایي شرکت (ایم سي سي ،ایم جي ایم )رئیس ښاغلي وانګ جیچین سره وکتل او د باغدرې د برېښنا بند د مطالعاتي پروژې د پرمختګ او د دواړو لوریو ترمنځ د همکاریو د پراخوالي په اړه یې بحث وکړ.
په دې لیدنه کې، د (ایم سي سي) شرکت رئیس د اوبو او انرژي وزارت له همکارۍ څخه، په ځانګړې توګه د باغدرې د برېښنا بند د تخنیکي مطالعاتو د پرمختګ په برخه کې مننه وکړه او یادونه یې وکړه چې د دې بند جیوتخنیکي او جیوفزیکي مطالعات په ښه توګه روان دي.
نوموړي زیاته کړه چې د MCC شرکت هوډ لري چې هممهاله له مطالعاتو سره د بند د ساختماني کارونو د پلي کولو قرارداد هم له وزارت سره لاسلیک کړي.
همداراز د یاد شرکت رئیس د شاتوت للندر بند د پلي کولو په برخه کې د پانګونې لیوالتیا هم څرګنده کړه.
په ورته وخت کې د اوبو او انرژي وزارت سرپرست یاد شرکت ته د لازمې همکارۍ ډاډ ورکړ او د باغدرې برېښنا بند د اهمیت په یادولو سره یې د تخنیکي مطالعاتو پر چټکتیا ټینګار وکړ.
ښاغلي منصور همداراز د یاد شرکت د شاتوت للندر بند د پانګونې په لور لیوالتیا وستایله او وړاندیز یې وکړ چې د پانګونې د چارو د همغږۍ لپاره دې د دواړو لوریو ترمنځ د همکارۍ تفاهمنامه لاسلیک شي او د تفاهمنامې له مخې دې عملي ګامونه واخیستل شي.
