د اوبو او انرژي وزارت سرپرست وزیر د ملي انکشاف شرکت له رئیس سره ناسته تر سره کړه.
د اوبو او انرژي وزارت سرپرست وزير محترم ملا عبداللطیف منصور په داسې حال کې چې د یاد وزارت د اوبو معين محترم انجنیر مجیبب الرحمن عمر اخندزاده هم حاضر وو، د ملي انکشاف شرکت لۀ رئیس ښاغلی عبدالرحمن عطاش سره ناسته ترسره کړه.
پۀ دغه ناسته کې د وزارت لهً خوا د اوبو د لویو بندونو او کانالونو د جوړولو په ځانګړي ډول د خوشتيپې کانال د پروژې په هکله بحث او د نظر تبادله وشوه؛ او پرېکړه وشوه، چې د یاد کانال چارې دې د اوبو او انرژي وزارت تر څارنې لاندې پرمخ یووړل شي.
په دې ناسته کې د اوبو او انرژي وزارت سرپرست وزیر محترم ملا عبداللطیف منصور د اوبو د مدیريت د پروژو په هکله خبرې وکړې؛ د مشکلاتو د حل او د پروژو د تطبيق په هکله يې په لازمه همغږي باندې ټينګار وکړ.
د ناستې په ترڅ کې د ملي انکشاف شرکت رئیس ښاغلي عطاش د اوبو او انرژي سرپرست وزير ته ډاډ ورکړ، چې ددې وزارت د پروژو د تطبيق په لاره کې به خپلې ټولې هڅې په کار واچوي؛ او د چارو په ترسره کولو کې به د پروګرام او لارښوونو سره سم پرمخ ولاړ شي.
دغه راز د ملي انکشاف رئیس په هېواد کې د انرژي د توليد په برخه کې د خپلو برنامو په هکله معلومات وړاندې کړل؛ او وزارت ته يې د خپلې بشپړې مرستې او همغږي وعده ورکړه.
