د اوبو او انرژي وزارت سرپرست وزیر د نیمروز ولایت له والي سره وکتل
د اوبو او انرژي وزارت سرپرست وزیر ښاغلي ملا عبداللطیف منصور د خپل کار په دفتر کې په داسې حال کې چې د اوبو معین ښاغلي انجنیر مجیب الرحمن عمر هم شتون درلود، د نیمروز ولایت له والي ښاغلي ملا نجیب الله رفیع سره وکتل.
په یاده لیدنه کې، په نیمروز ولایت کې د اوبو او انرژي پروژو د پلې کېدو په برخه کې په ځانګړي ډول د کمال خان بند پروژې د پاتې چارو د بشپړولو په هکله بحث او د نظر تبادله وشوه.
د نیمروز والي په دې لیدنه کې د اوبو او انرژي وزارت د رهبري له مقام څخه د کمال خان بند پروژې د پاتې چارو او په نیمروز ولایت کې د برېښنا رسولو د پراختیا غوښتنه وکړه.
د اوبو او انرژي وزارت سرپرست وزیر د نیمروز والي ته ډاډ ورکړ، چې د کمال خان بند د پاتې چارو په هکله شونې هڅې ترسره شوې او ان شاالله په نږدې راتلونکي کې به یې کار پیل شي.
