د اوبو مدیریت د هر اړخیزې پراختیا د لارې د نقشې د چمتوکولو په موخه مشورتي ناسته ترسره شوه
دغه ناسته د اوبو او انرژي وزارت د اوبو په معینیت کې د یونیسیف موسسې په همکاري سره په حضوري او آنلاین بڼه د اوبو او انرژي وزارت د اوبو معین محترم مجیب الرحمن عمر آخندزاده، د وزارت د مقام سلاکار محترم ډاکټر فاروق اعظم، د اوبو سکتور اړوندو وزارتونو د استازو، د اکاډمیکو او نړیوالو بنسټونو لکه یونیسیف، اف، اي، او، نړیوال بانک، داکار او نورو اړوندو بنسټونو په شتون کې ترسره شوه.
د اوبو او انرژي وزارت د اوبو معین په دغه ناسته کې وویل چې " اوبه ملي پانګه ده، آن حیوانات او نباتات هم پکې شریک دي، هېڅکله غیر مسؤلانه ګټې ورڅخه وانه خیستل شي، د هغې څخه عاقلانه ګټه اخیستنه او په هر اړخیز مدیریت سره یې نه یوازې اوسنی ژوند بلکې کولای شو، چې راتلونکی هم وژغورو".
د اوبو معین ټینګار وکړ، چې د اوبو د مدیریت لپاره اړتیا ده، چې ټول ملي او نړیوال بنسټونه په بشپړ همغږي سره په ګډه کار وکړي.
د ناستې په بهیر کې، ګډونوالو د نوموړي سند د بډاینې او پراختیا او همدارنګه د اوبو د هر اړخیز مدیریت په برخه کې د انسجام او لا زیاتې همغږۍ لپاره خپل وړاندیزونه او حل لارې له یو بل سره شریک کړل، ترڅو د اوبو مدیریت اړوندې چارې په منسجم او منظم ډول پرمخ یو وړل شي.
