د اوبو ګټه اخیستونکو د سرچینو د ستونزو هوارولو په موخه د اړوندو ادارو ترمنځ د همغږي ناسته ترسره شوه
دا ناسته د اوبو او انرژي وزارت د یو شمېر رئیسانو، د صنعت او سوداګري وزارت او د اوبو رسولو شرکتونو د یو شمېر استازو په ګډون د اوبو سرچینو د ستونزو هوارولو او د اوبو سرچینو څخه د سمې او معقولې ګټه اخیستنې په موخه د هماهنګي لپاره ترسره شوه.
په دغه ناسته کې، په صنعتي پارکونو کې د اوبو رسولو شرکتونو د کره شمېر د څېړنې په هکله، د شرکتونو له خوا د اړتیا وړ د اوبو د اندازې اټکل، د صنعتي پارکونو د اوبو د تامین په موخه د اوبو او انرژي وزارت او د صنعت او سوداګري وزارت ترمنځ د هوکړه لیک ترتیبول، د پنجشیر سیند څخه کابل ته د اوبو د لیږد پروژې په برخه کې د پانګونې جلبول او د استوګنې او سوداګریزو ګټه اخیستونکو لپاره د اوبو د سپمولو په موخه د پوهاوي پروګرامونو ترتیوبولو باندې بحث او د نظر تبادله وشوه.
د ناستې په بهير کې د کابل ښار د اوبو سرچینو وضعیت تر څېړنې لاندې ونیول شو او په ورځنې ډول د اوبو سرچینو د کمېدو په پام کې نیولو سره ټولو ګډونوالو د اوبو سرچینو د غوره مدیریت او سپما په هکله د مشخصو برنامو د رامنځته کولو او پر اړینې همغږي باندې ټینګار وکړ.
