د برق رسونې پروژو د مشکلاتو د حل په موخه ګډه ناسته ترسره شوه

د برق رسونې پروژو د مشکلاتو د حل په موخه د بريښنا شرکت مسؤلینو او قراردادي شرکتونو له استازو سره ګډه ناسته ترسره شوه.
د اوبو او نرژي وزارت سرپرست وزیر ملا عبداللطیف "منصور" په خپل کاري دفتر کې د ZNCC شرکت له استازي او د افغانستان بريښنا شرکت له یو شمیر مسؤلینو سره د ستونزو د حل، له غزني څخه قندهار ته د برق د لین د انتقال پروژې د پاتې کارونو د بیا شروع کیدو او د کجکي بند د دوهم فاز بریښنا د ويش په اړه بحث او د نظرونو تبادله وکړه.
په دې ناسته کې د قراردادي شرکت استازي او د افغانستان بريښنا شرکت مسؤلینو د پروژو د پرمختګ د وضعیت او ستونزو په اړه لازم توضیحات وړاندې کړه، او د دې پروژو د پاتې کارونو  د تطبیق په اړه د اوبو او انرژي وزارت رهبرِ مقام څخه د لازمو هدایاتو غوښتونکې شول.
د اوبو او انرژي وزارت سرپرست وزیر ښاغلي "منصور " د پروژو دستونزو د څېړلو پروخت وویل چې یوه مشخصه کمېټه دې د پروژو دڅېړلو په موخه مؤظف شي ترڅو د پروژو د پرمختګ وضعیت بررسي کړي او د هغې ټول تجهیزات ثبت کړي. هغه د دې پروژو د اهمیت د یادولو ترڅڼګ زیاته کړه چې مونږ هڅه کوو هرڅومره ژر چې کیدای شي شته ستونزې حل کړو او د دې پروژو پاتې کارونه پیل کړو.