د خوست ولایت اړوند ۹ چکډم پروژو قراردادونه لاسلیک شول
د خوست ولایت اړوند ۹ چکډم پروژو قراردادونه لاسلیک شول. د اوبو د چارو د تنظیم ملي ادارې تخنیکي مرستیال انجینر احمد ویس بصیري د خوست ولایت اړوند د ۹ چکدم پروژو قراردادونه د ۹۱.۷ میلیونه افغانیو په ارزښت، په ولسي جرګه کې د دغه ولایت د خلکو استازو او د یادې ادارې يو شمېر رئیسانو په شتون کې لاسلیک کړل. دغه پروژې د اوبو د چارو د تنظیم ادارې لخوا د اوبو مدیریت او د سلابونو د کنټرول په موخه د خوست ولایت په مرکز دباک، تڼي، ګربز، ځاځي میدان ولسوالیو کې په لاره اچول شوي دي. د اوبو د چارو د تنظیم د ملي ادارې تخنیکي مرستیال انجینر احمد ویس بصیري د اوبو مدیریت، د سیلابونو کنټرول، چاپېریال ساتنې او د ځمکې لاندې اوبو د پياوړتیا په برخه کې د چکډمونو جوړول اړین او ګتور ياد کړل. همدارنګه ښاغلي بصیري د وکیلانو له همیشنۍ همکارۍ مننه وکړه او د چارو په بهبود او چټکتیا کې یې د وکیلانو د ډې همکاري هیله وکړه. ښاغلي بصیري زیاته کړه چې زموږ ماموریت د اوبو مهار کول دي چې د چکدمونو جوړول ددې پروسه تر ټولو اړین قدمونه دي چې دا لړۍ به دوام و لري. په ورته وخت کې د خوست ولایت استازو، ډاکټر موسي خاورین، انجینر هلمند هلمند او ساهره شریف د اوبو د چارو د تنظیم ملي ادارې د کړنو ستايلو تر څنګ د اوبو مدیریت او د سیلابونو د کنټرول په برخه کې د دغه ډول پروژو پلي کول ګټور ګام وبله او د پلي کولو په برخه کې یې ډاډ ورکړ. د یادونې وړ ده چې د دغه پروژو پلي کولو سره به ۳۱۸۰ هکټاره کرنیزه ځمکه خړوبیږي؛ ۲۵۰ زره متره مکعب اوبه به ذخیره کوي او ۱۱ زره کورنۍ به ترې ګټه پورته کوي.
