د عزیزي انرژي ګروپ له لوري د لس زره مېګاواټه برېښنا تولید پروژې د لومړي فاز عملي چارې به ډیر ژر پیل شي
د اوبو او انرژي وزیر محترم الحاج ملا عبداللطیف منصور د ریاست الوزرا د اقتصادي مرستیال محترم الحاج ملا عبدالغني برادر په شتون کې د عزیزي انرژي ګروپ له عمومي رئيس محترم میرویس عزیزي سره وکتل او د لس زره مېګاواټه برېښنا د تولید پروژې د عملي چارو د پيل په هکله بحث او د اندونو تبادله وکړه.
په دغه لیدنه کې، ښاغلي عزیزي د لس زره مېګاواټه برېښنا د تولید پروژې د چارو د پرمختګ راپور د ریاست الوزرا اقتصادي مرستیال ته وړاندې کړ او زیاته یې کړه، چې د هوکړه لیک تر لاسلیککېدو وروسته یې تخنیکي ټیمونو د اړوندو وزارتونو له تخنیکي ټیمونو سره یوځای بغلان، بلخ، جوزجان، هرات او بامیان ولایتونو ته ولېږل، چې د یو شمېر پروژو لومړنۍ سروې ترسره او تخنیکي معلومات یې را ټول کړي دي.
همدارنګه، ښاغلي عزیزي په دغه لیدنه کې د لس زره مېګاواټه برېښنا د تولید پروژې د عملي کولو ډاډ ورکړ او زیاته یې کړه، چې دغه پروژه به په درېیو فازونو کې عملي شي، چې لومړی فاز یې د څلور زره مېګاواټه برېښنا د تولید وړتیا لري.
همدغه راز، په دغه ناسته کې د لس زره مېګاواټه برېښنا د تولید د قراردادنو د لاسلیک کېدو په هکله هم خبرې، اترې وشوې.
