د عزیزي ګروپ شرکت له مسؤلینو سره د نوموړي شرکت له لوري د انرژي په پروژو کې د پانګونې چارو د پرمختګ د څېړلو په موخه د همغږي ناسته ترسره شوه
دغه ناسته نن، شنبه( د ۱۴۰۴ هـ ل کال د وږي ۲۲) د اوبو او انرژي وزیر محترم الحاج ملا عبداللطیف منصور، د دغه وزارت د یو شمېر رئيسانو او د عزیزي ګروپ شرکت د تخنیکي مسؤلینو په شتون کې د وزارت مقام د غونډو په تالار کې ترسره شوه.
د ناستې په بهیر کې، د وزارت او عزیزي ګروپ شرکت تخنیکي مسؤلینو د انرژي پروژو د پېژندنې او د پروژو ټاکلو وروستي کولو په برخه کې د پرمختګ او د راتلونکو پړاوونو د پرمخ وړلو د څرنګوالي په هکله بشپړ راپور د اوبو او انرژي وزارت د رهبري مقام حضور ته وړاندې کړل.
د اوبو او انرژي وزیر د تخنیکي ټیمونو د راپور تر اورېدلو وروسته، د چارو پر چټکتیا باندې د ټینګار ترڅنګ، ډاډ ورکړ چې د اوبو او انرژي وزارت به په دې برخه کې هر اړخیزې همکارۍ چمتو کړي.
د یادونې وړ ده، چې د عزیزي ګروپ شرکت د هغه هوکړه لیک پر بنسټ چې تر دې مخکې له دغه وزارت سره لاسلیک کړی، ټاکل شوي ده چې په هېواد کې د انرژي په پراختیایي پروژو باندې د ۱۰ زره مېګاواټه برېښنا د تولید په وړتیا پانګونه وکړي. د دواړو لورو تخنیکي ټیمونه د دغې پانګونې لومړنۍ چارې په ګډه سره پيل کړې، چې تر اوسه پورې په دې برخه کې ښه پرمختګ کړی دی.
