د فراه او نیمروز ولایتونو استازو او مشرانو سره د اوبو مدیریت پراختیايي پروژو په اړه لیدنه.
د اوبو د چارو د تنظیم ملي ادارې لوی رئیس او د انرژي خدماتو د تنظیم ادارې سرپرست ښاغلي انجنیر خان محمد تکل په ولسي جرګه کې د نیمروز ولایت استازي ګل احمد نورزاد او د فراه ولایت استازي عبدالغفار ارمان او د دغه ولایتونو قومي مشرانو سره وکتل.
په دغه لیدنه کې د نیمروز او فراه ولایتونو استازو او قومي مشرانو خپلې اړتیاوې او ستونزې د اوبو د چارو د تنظیم ملي ادارې رهبرۍ مقام سره شریکې کړې او په دغه ولایتونو کې د پراختیاي پروژو د پلي کولو غوښتنه وکړه.
د اوبو د چارو د تنظیم ملي ادارې لوی رئيس ښاغلي انجنیر خان محمد تکل د ولس استازو او قومي مشرانو ته په نیمروز او فراه ولایتونو کې د کار لاندې او په پلان کې پروژو په اړه معلومات وړاندې کړل او د اوبو مدیریت په برخه کې د پراختیاي پروژو، د لویو، متوسطو او کوچنیو بندونو، چکډم، کانالونو او کاریزونو جوړولو ډاډ ورکړ.
ښاغلي تکل د دغې ادارې د انجنیري خدماتو او د برنامو همغږۍ رئيسانو ته دنده وسپارله تر څو ژر تر ژره د نیمروز او فراه ولایتونو پروژو سروې په موخه یو تخنیکي ټيم واستوي.
په اخر کې د نیمروز او فراه ولایتونو استازو او قومي مشرانو د کمال خان، بخش اباد او ډیرو نورو پروژو په تطبیق کې د اوبو د چارو د تنظیم ملي ادارې د رهبرۍ جدیت او پشتکار قدرداني او مننه وکړه.
